Mga Mining Propeta

Ang Pulong sa Kinabuhi karong adlawa mao ang pagpanghimangno ni Jesus mahitungod sa mga mini nga mga propeta. Sa saysay sa ikaduhang sulat ni San Pedro, siya mingon, nga “motungha usab diha kaninyo ang mga mining propeta. Magpayuhot sila’g mga bakak ug makadaot nga mga pagtulun-an ug isalikway nila ang agalon nga nagluwas kanila. Mipadayon ang saysay sa pag-ingon nga bisan pa niini, daghan ang misunod kanila sa ilang mga buhat nga daotan busa pasipad-an sa mga tawo ang matuod nga dalan. (2 Pedro 2:1-3).

Sa katilingban nga atong gipuy-an karon, sarang atong mamatikdan, og dili ikalimod sa atong kahibalo nga adunay mga tawo o pundok sa katawhan nga nagsabwag ug mga pagtulun-an nga dili lamang sayop, kundili nagdala ug mga kagabot ug pagbingkilay sa usag-usa. Kining mga pagtulun-ana ang miguba sa kahingpitan sa katilingban nga giplano sa Diyos alang sa kalibutan.

Sama pananglit sa pagtudlo nga si Jesus dili Diyos, nga siya tawo lamang sama kanato. Usa kini ka dakong pagtamparos sa kadayeganan sa Diyos Anak kinsa mao ang himaya sa Amahan ug gikahimut-an sa Amahan pag-ayo. Dugang pa niini adunay mga pagtulun-an nga nagtudlo dala ang pagtuis sa Mahal nga Birhen Maria, mga pagtulun-an nga nagbiay-biay sa Inahan sa Diyos, nga si Maria dili angay nga pasidunggan tungod kay ang pagpasidungog iya lamang sa Diyos. Kini maong pagtulun-an usa ka pagtamparos sa kadayegan sa Diyos kinsa nagpuno kang Santa Maria ug mga grasya ug nag-andam kaniya nga mamahimong agianan sa pagkatawo sa iyang Bugtong Anak. Kining maong mga pagtulun-an ug daghan pa nga sama niini gisabwag sa mga propetang mini, ug mga tig-pakaaron ingon ug nagguba sa kahingpitan sa katilingban.

Sa laing bahin, aduna usab daghan nga mga pagtulun-an o mga balaod nga wala lamang mag-iwag sa saktong kahayag kundili nagpalibog ug nagkutaw ug mga isyong moral nga giampingan ug gipanalipdan sa Simbahan. Kining maong mga pagtulun-an ug mga balaodnon sama sa RH Bill, mipanamastamas sa dignidad sa kinabuhi ug mipatay sa diyosnong kinaiya sa tawo. The RH Bill insults human dignity and in one way or the other, kills the divine nature of human being. Ang bunga niining maong balaodnon ug pagtulun-an kamatayon tungod niini wala kini mahisubay sa Disyong kabobot-on sa atong Magmumugna. Dugang pa niini gi-endorso usab nga himoong balaod ang diborsyo, or Divorce Bill, tungod sa simpleng hinungdan, nga sa tibouk kalibutan, ang Pilipinas lamang ang nasud nga wala niining balaora. Ug busa tungod niini kinahanglan ba gyud ang ipasa kini tungod ug alang sa maong walay hinungdan nga mga rason.

Mga binati kong mga kaigsoonan sa pagtoo, atong mamatikdan nga ang mga pamaagi sa huna huna sa mga mining propeta wala magalantaw sa kaayohan sa tanan, wala nila pagatan-awa ang mga kahimtang sa umaabot kundili ilang gitagaan ug pagtagad ang mga butang nga makaayo lamang kanila. Ang mga isyo nga gitudlo sa mga mini nga mga propeta mga pagtulun-an nga miguba sa kalinaw, mipalibog sa mga nakasabot, mipangitngit sa mga anaa sa kahayag ug nagdala kanila ngadto sa balikog nga agianan. Sa ebanghelyo karong adlawa si Jesus mipahimangno kanato, “nga mailhan ninyo sila sa ilang mga binuhatan.” Kung ang maong binuhatan o pagtulun-an wala magdala ug kalinaw, wala ma-agni ug kaangayan ug wala magagikan sa gugma, nan kana mini nga pagtulun-an ug gikan kini sa mini nga mga propeta. Ang sampinit dili mamunga’g ubas, ang kadyapa dili mamunga’g igos. Mahimangno ni Jesus alang kanatong tanan. Amen

Ang Saad sa Espiritu Santo

Ang Pulong sa Kinabuhi karong adlawa mao ang saad para kanato ni Jesus sa Espiritu Santo. Si Jesus sa iyang dayon nga pagkayab ngadto sa langit, misaad kanatong tanan sa pag-ingon, “Dili ko kamo pasagdan nga mag-inusara, hatagan ko kamo ug laing manlalaban, ang Espiritu sa kamatouran.” Ang saad sa Espritu Santo alang kanato gihatag sa Diyos tungod kay nasayod ang Diyos ang huyang ang tawo, nasayod Siya nga daling mapukan ang tawo sa kasal-anan. Ang gasa sa Espiritu Santo nga gipaambit sa Diyos ngari kanato mao kini ang molig-on kanato sa atong mga sa mga kahuyangan, mopatingog kanato sa atong pagkasukamod ug mag-giya kanato sa atong pagbalik ngadto sa Diyosnong panon.

Ang Espritu Santo mao ang Espiritu sa Kamatouran, ug siya mao ang motultol kanato sa atong pag-ila sa tibouk kamatuoran niining kalibutan. Sa atong panahon karon, daghan ang nagpaila nga sila anaa sa kamatouran, nga ang ilang pagtulun-an subay sa kamatouran, apan si kinsa ba ang adunay katungod sa pag-angkon nga sila naa sa kamatouran? Ang tubag sa maong pangutana naa sa atong ebanghelyo karong adlawa. “ Daghan pa unta kaayo akog isulti kaninyo, apan karon dili pa kamo makatudkad niini. Apan inig abot sa Espiritu sa kamatouran, tultolan kamo niya sa tibouk kamatouran.” ( Jn. 16:12-13) Dayag nga gihatag sa Diyos ang tibouk kamatouran ngadto sa Simbahan aron huptan, tun-an ug itudlo sa uban. Nan kinsa karon ang adunay katungod sa pagtudlo sa kamatouran? Kini wala’y lain kundili ang Simbahan.

Sa init kaayo nga isyu mahitungod sa RH BILL, kadtong dili uyon sa pagtulun-an sa Simbahan migamit og mga datus, nagkalain-lain mga pagtuon aron sa paglig-on sa ilang gibarogang kamatouran, but please be reminded, the truth is not just about data, it’s not just about empirical research for all human endeavors are but insufficient when we speak of Truth. Kung kamatouran ang atong hisgotan, kulang ang mga tawhanung datus nga atong nahipos, kulang ang mga pagtuon gamit ang tawhanong panghuna-huna kulang. Ang kahingpitan sa kamatouran anaa lamang kang Jesus – Ako mao ang dalan, ang kamatouran ug ang kinabuhi. (Jn. 14:16)

Toud man dili nato mahuptan ang gahum sa Espiritu Santo. We cannot prevent the Spirit to penetrate even to those people who continue to deny the teachings of the Church. Wala kita mag-ingon nga ang mga tawo nga wala miuyon sa pagtulun-an sa Simbahan, wala kanila ang Espiritu Santo, dili kita mao ang adunay katungod sa paghukom kanila, ang paghukom iya sa Diyos, ug sa Diyos lamang. Apan naghatag ang atong ebanghelyo karon ug mga timailhan kung kita anaa ba sa Espiritu sa Kamatouran. 1.) Kung anaa kita sa Espiritu sa kamatouran, dili kita magsulti sa atong kaugalingong pagbout, kundili kung unsa ang atong nadungog sa Espiritu sa mga butang umaabot. (Jn. 16: 13) 2.) Kung anaa kita sa Espiritu sa Kamatouran himayon nato ang ngalan ni Jesus. (Jn. 16: 14) 3.) Kung anaa kita sa Espiritu sa Kamatuoran dawaton nato ang mga pagtulun-an sa Espiritu nga gikan sa Diyos ug isugilon kini sa uban.

Niining maong mga timailhan, atong tan-awon ug mamalangdon kita sa atong kaugalingon. Naa ba kita sa Espiritu sa kamatuoran. Ang atong gituohan mahitungod niing balaodnon ato bang nadungog diha sa pag-ampo nga gitudlo sa Espiritu Santo o ato kining nabasa o nakita diha sa mga datus nga gipadayag sa mga balita sa pahayagan o telebsiyon. Sa atong pagsabot niining RH BILL ato bang gihimaya ang ngalan sa Diyos, o gidaot ug gipasipad-an hinoon nato ang Simbahan sa iyang pagtulun-an kinsa mao ang esposa sa Diyos nga Anak. Ug sa kataposan, ang RH BILL ba pagtulun-an sa Simbahan nga gipadayag sa Espiritu sukad pa sa sinugdan sa kalibutan o kini hinimo lamang sa tawo tungod ug alang sa iyang personal nga interes.

Kung kita anaa sa Espiritu sa Kamatuoran kita nagpuyo niining maong mga timailhan, apan kung sa atong pagbansay bansay wala kita mahasubay niini, giawhag ko kamo sa pag-ampo pangayo sa giya sa Espiritu, paminawa ang inyon konsensiya diha sa lamdag ug sa init sa Espiriruhanong kaalam! Amen.

Umari ka, Espiritu Santo, ug Bag=oha ang dagway sa yuta! Amen.

Diyosnong Gugma

Ang Pulong sa Kinabuhi karong adlawa mao ang katingalahang gugma sa Diyos. Sa atong ebanghelyo karon atong nadungog ang gisaysay ni San Juan, “gihigugma pagayo sa Diyos ang kalibutan ug tungod niini gihatag niya ang iyang bugtong anak, aron ang tanan nga motuo kaniya dili mamatay, kundili makabaton hinoon ug kinabuhing dayon.”

Dinhi atong masaksihan ug masayran nga ang Diyos adunay dako ug halapad nga gugma sa kalibutan ug kining maong gugma nahimong matuod ug nakita sa tanan diha ni Jesukristo. Ang gugma sa Diyos dili lamang usa ka huna-huna, dili lamang usa ka pulong o ideya, ang gugma sa Diyos adunay hulagway – the love of God has a face; ug kini mao si Jesukristo. Ang hulagway sa gugma mao kadtong si Jesus nga natawo sa pasungan kauban sa iyang inahan nga si Maria ug si San Jose. Didto sa mabugnaw nga dapit sa Bethlehem unang naaninagan ang dagway sa gugma nga mao ang mapaubsanong Diyos nga nangpakatawo ug mipuyo uban kanato. Ang hulagway sa gugma, mga binati kong mga kaigsoonan mao ang dagway sa pagpaubos sama ni Jesus.

Sa laing bahin, ang gugma sa Diyos gawas nga kini adunay hulagway, aduna usab kini pagkatawo. The love of God has embodiment, and the embodiment of God’s love is JesusChrist. Diha sa ministeryo ni Jesus una niya gipasabot ang tinoururay nga kahulugan sa gugma. Kini mao ang paghatag sa iyang kaugalingon dinha sa buhat sa pagpang-ayo sa daghang masakiton, pagpabalik sa panan-aw sa mga buta, pagpalakaw sa mga bakol, pagpalayas sa mga dautang espiritu. Paghimo ug daghang milagro ug pagpabuhi ug mga patay. Ang gugma sa Diyos gipakita dinha sa pagkatawo ni Jesus kansang kinabuhi napuno sa nagkadaiyang mga pagpanlutos, pagtaral, ug pagpalansang sa krus – apan kining gugma mas isog pa kay sa kamatayon, kay bisan ang kamatayon dili makabuntog niini. Ang gugma sa Diyos nga nagpakatawo dinha ni Jesukristo, nabanhaw ug siya miuban kanato hangtod sa atong panahon karon. Ang gugma sa Diyos adunay pagkatawo ug ang pagkatawo sa gugma mao ang atong pagsakripisyo sama ni Jesus.

Ang katingalahang gugma sa Diyos gawas nga kini adunay hulagway, adunay pagkatawo, aduna usab kini espiritu. Kining espiritu sa gugma mao kini ang mipabuhi sa pagtoo sa mga nawad-an na niini. Kini siya mao ang tinubdan sa kaisog, sukaranan sa kaligdong ug gigikanan sa kalinaw. Ang espiritu sa gugma mao ang nagpahiusa kanatong tanan nga mga binunyagan, siya mao ang kahayag nga nag-iwag sa atong ngitngit nga mga dalan. Ug kadtong mga tawo nga nagpuyo sa espiritu sa gugma sila lamang kadtong mga tawo nga anaa sa kahayag ug mga tawo nga nagpuyo sa kamatuoran. Ang gugma sa Diyos adunay espiritu ug ang espiritu sa gugma sa Diyos mao ang kamatuoran.

Mga binati kung mga kaigsoonan diha ni Jesukristo, sa kadako sa gugma sa Diyos ngari kanato iyang gihatag kanato ang iyang bugtong anak nga si Jesukristo isip ehemplo sa Diyosong gugma. Ug kining Diyosnong gugma nagkahulugan og hulagway sa pagpaubos, pagsakripisyo ug pagpuyo sa kamatuoran. Alang kanatong mga katawhan giawhag kita sa pagtan-aw pagbalik sa atong kinabuhi ug kini nagasubay pa ba sa Diyosnong gugma, diin atong gipuy-an ang kinabuhing mapaubsanon, atong gipalawig ang kinabuhi sa pagsakripisyo tungod ug alang sa kaayohan sa atong isigtawo ug sa kanunay atong gilig-on ang atong kinabuhi ilalom sa lamdag sa esprittu sa kamatuoran. Kini mao ang Diyosnong gugma. Gugma nga unang gipaambit sa Diyos alang kanato, ug karon mao ang takna ug kahigayonan diin kita nausab ang mopaambit niining maong Gugma ngadto balik sa Kaniya.

Uban sa grasya sa Diyos kinsa tuburan sa gugma ug kalooy, ato untang maangkon ang tanan nga atong gipangaliya ug gipangayo Kaniya. Amen!

Pagpikas-pikas sa Pan

Karong adlawa Miyerkoles sa Oktaba sa Pasko sa PAgkabanhaw ni Jesukristo. Ang Pulong sa Kinabuhi karong adlawa mao ang pag-kaila sa mga tinun-an ni Jesus sa Iyang pagpikas-pikas sa pan.

Atong masayran mga binati kong mga kaigsoonan, nga hangtud sa pagkabanhaw sa atong Ginoong Jesukristo, ang iyang mga tinun-an, ingon man ang iyang mga sumusunod wala pa gayud makaila kaniya sa kinatibuk-an gayod. Kini naipakita dinha sa saysay atong ebanghelyo nga nadungog karong adlawa nga sa dihang nahimamat nila si Jesus sa dalan padulong sa Emmaus, duha sa mga tinun-an nahinagbo ni Jesus. Ila kining nakita, ila kining nahinabi, ug ila kining nakauban, apan wala nila siya mailhi. Sa pagkatinoud ila hinoong giingnan si Jesus agig tubag sa iyang pangutana,“Ikaw ra bay nagpuyo sa Jerusalem nga wala mahibalo sa mga nahitabo didto niining pipila ka adlaw nga milabay?” Kini maong tubag nagpadayag sa ilang pagkahanaw sa pag-ila kung kinsa ba gayud kining Magtutudlo nga ilang nakauban, ug kini usab nagpadayag sa ilang pagkahanaw sa mga pagtulun-an nga gisangyaw si Jesus nga ilang magtutudlo. Wala sila makaila kang Jesus. Sulod sa tulo ka tuig nilang uban uban diha sa balaanong ministeryo ni Jesukristo ug sa iyang buhat sa pagpanluwas, wala makatuhop kini sa mga kasing-kasing sa iyang mga disipulos.

Ang nahitabo sa dalan sa Emmaus usa ka dakong realidad sa atong mga tagsa-tgasa ka mga kinabuhi. Usahay maanindot nga kita mangutana sa atong mga kasing kasing unsa ka lawom ug kalapad ang atong pagkaila ni Jesukristo nga nabanhaw ug unsa ka lawom ug unsa kalapad ang atong pagsabot sa iyang mga pagtulun-an.

Ang tawo kansang pag-ila sa Diyos mabaw ug taphaw lamang, kini mao ang mga tawo nga modoul lamang kung adunay panginahanglan, mga tawong motawag lamang ug Diyos kung kini alang sa ilang pagpangayo og pabor, mga tawong makaila lamang og Diyos kung naa na sila sa kalisdanan og kasakitan, kini mao ang mga tawo nga wala makatuhop sa ilang pag-ila sa Diyos. Mao nga bisan ang Diyos ilang nahibalag, bisan ilang nakit-an ang Diyos, ug bisan ilang nahinabi ang Diyos, dili nila kini mailhan kay ang Diyos naa lamang sa ilang hunahuna ug wala makapuyo sa ilang kasing kasing.

Apan ang Diyos nagbuhat ug mga butang aron siya mailhan, aron siya makit-an ug aron Siya mahibalik sa kinabuhi sa tawo ug kini iyang gipakita sa dihang gipikas-pikas niya ang pan. Naabli ang salabutan sa mga tinun-an nga misalo kaniya sa panihapon. Ug diha diha ilang nailhan ang Nabanhawng Jesus apan nahanaw siya. Mga binati kong mga kaigsoonan ang nabanhaw nga Anak sa Diyos nga si Jesukristo, wala mibiya kanato human sa iyang diosnong misyon sa kalibutan. Human sa iyang pagpakamatay sa krus ug sa iyang pagkabanhaw miuban siya kanunay kanato hangtod karon dinha sa pagpikas-pikas sa pan - Ang Santos nga Eukaristiya.

Mao nga sa matag apil ug tambong nato sa santos nga misa atong kipakabuhi si Jesus sa atong kasing-kasing, ato siyang gitagaan og importanteng luna sa atong kinabuhi ug ato siyang gipasidungan isip Diyos nga nagpakatawo, mipuyo uban kanato, namatay ug gilubong ug unya nabanhaw nga mahimayaon ug mibalik sa Amahan. Ang kinabuhi si Jesus nga nabanhaw mao usab ang kinabuhi nga atong pagaawaton – pagbuhat sa kabobot-on sa Amahan, pagpasidungog sa Amahan ug pagbalik ngadto kaniya nga mahimayaon. Kining tanan motuhop lamang sa atong mga kasing-kasing ug mailhan lamang nato ang kung sa kanunay kita nagasalmot ug nagatambong sa balaang kasaulugan sa Santos nga Eukaristiya. Kay dinhi niining maong kasaulugan atong nahimamat ug atong gikalawat ang tinoud nga presensya ni Jesus ang nabanhawng Anak sa Diyos.

Uban sa atong mga pag-ampo ug pangaliyupo, kining tanan unta atong maangkon diha sa grasya ug gugma sa Diyos. Amen

Ang Pagbudhi ni Judas

Karong adlawa miyerkoles santo. Sa atong pagpadayon sa pagpamalandong niining semana santa, ang Pulong sa Kinabuhi nga atong pamalandongan karong adlawa mao ang Pagbudhi ni Judas. Kung adunay hilabihang kasakit nga nasinati ni Jesukristo sa iyang kinatibuk-ang kinabuhing tawhanon kini dili ang mga inhustisya nga iyang nabati sa kamot sa mga pangulong pari, dili ang mga mapintas nga latos ug latigo nga tunukon sa mga kamot sa mga tampalasan, dili ang kabug-at sa krus nga iyang gipas-an paingon sa bukid sa kalbaryo, kundili, walay kasakit na mas hilabihan pa sa pagbudhi sa iyang kaugalinong mga tinun-an nga iyang gimahal ug iyang gisaligan.

Ang pagbudhi ni Judas simbolo sa tawhanung kahuyang, simbolo sa atong mga kahadlok o kabalaka, simbolo sa atong pagka dili takus. Bisan tuod ang atong ebanghelyo karon naghisgot sa plano ni Judas sa pagbudhi kang Jesukristo, ug ang panagna ni Jesus nga usa kaninyo magbudhi kanako, ang ebanghelyo nagawhag kanato sa pagpalawom sa atong panabot. Dili lamang kay si Judas ang angay nga pagatawgon nga mabudhion o traydor tungod kay silang tanan, ang iyang mga tinun-an mibudhi kaniya sa dihang sila mipalayo ug nanagan sa kahadlok.

Sa laing bahin sa kasulatan, si Pedro milimod kang Jesus sa makatulo. Sa makatulong higayon midumili, mibudhi ug miabandona si Pedro sa iyang magtutudlo Jesukristo, kinsa mao, nga sa iyang kaugalingong mga mata nakakita nga nag-ayo sa dahang masakiton, mipabalik sa panan-aw sa mga buta, mipabalik sa pandungog sa mga bungol, mipalakaw sa mga bakol, mipakaon sa lima kalibo ka tawo, nagpasaylo sa mga sala ug nagbanhaw sa mga patay. Nakita ug nasaksihan kini ni Pedro sa iyang pag-uban uban ni Jesus, apan nawagtang kining tanan, napapas ang iyang pagtoo sa dihang gipangutana siya sa makatulo, “nakaila ka ba nianang tawhana?” Nahanaw ang tanan, milimod si Pedro tungod sa iyang kahuyang ug kahadlok.

Si Judas Iscariote diha sa atong ebanghelyo gipanghimaraot ni Jesus sa pag-ingon, “alaot siya nga magbudhi sa anak sa tawo, Maayo palang untag wala siya mahimugso.” Kining maong mga pulong sa atong Ginoong Jesukristo nagpunting dili lamang kang Judas kundili sa pagkatawo ni Judas. What is attacked by Jesus is the nature of Judas’ human frailty. Dinhi gipasabot nga gimanghimaraot ni Jesus ang mga tawong walay baruganan, ang mga tawong talawan, ang mga tawong walay prisipyong gibarogan, o di kaha mga tawong isog apan nagbarog sa prinsipyong dautan, ug prinsipyong sayop. Wala lamang siya magpunting kang Judas, kundili gipunting usab ni Jesus ang kahimtang sa atong panahon karon.

Daghan kanato karon ang namaligya sa ilang prinsipyo. Daghan ang namaligya sa ilang pagtoo, daghan ang namaligya sa ilang kalag: kini sila ang mga Judas Iscariotre sa bag-ong panahon. Hangtod kanus a kita magpabilin sa maong kinabuhi. Hangtod kanus-a kita mobati sa mga kasakitan nga nahiaguman sa atong Ginoong Jesukristo diha sa krus.

Niining panahon sa semana santa, sa atong pagpangandam sa mahimayaong pagkabanhaw sa atong Ginoo, atong hinulsolan karon sa tinuoray gayud ang mga kalapasan ug mga kasal-anan nga atong nabuhat ug pangayoon nato ang pasaylo sa Diyos ug bation nato ang iyang tumang gugma pinaagi sa sakramento sa kumpisal. Giawhag kitang tanan sa pagdoul ug pag-angkon niining maong sakramento sa paghinulsol nga maghinlo kanato ug mag-andam kanato sa atong hinanaling kahimayaan uban sa nabanhaw’ng Jesus.

Pinaagi sa grasya sa Diyos ug sa iyang walay kinutubang gugma, maangkon unta nato ang atong gipangayo. Amen

Jesus: Usa ka Kinaiya sa Amahan

Ang Pulong sa Kinabuhi karong adlawa mao nga si Jesus usa ka kinaiya sa Amahan. Usa sa mga bug-at nga akusasyon nga gipahamtang kang Jesus, nga maoy hinungdan sa iyang pagpalansang sa krus mao nga dili lamang siya milapas sa balaod sa adlawa’ng igpapahulay kondili tungod sa iyang nga pag-angkon nga ang Diyos iyang Amahan, ug gipakasama niya ang iyang kaugalingon nga Diyos. Kining maong pag-angkon ni Jesus wala masabti sa mga kadagkoan sa mga Judio ug kay wala man kini nila masabti, dili nila kini madawat nga pagtulun-an.

Diha sa atong ebanghelyo karon dayag nga gipahayag ni Jesuskristo ang iyang dignidad isip Anak sa Diyos “aron ang tanan magpasidungog sa Anak ingon nga sila nagpasidungog sa Amahan.” Kining pagpasidunggog nga gihisgotan ni Jesus wala kini magpasabot sa pagpataas ni Jesus sa iyang kaugalingon; wala kini pagpasabot sa pagbayaw ni Jesus sa iyang digindad ug sa pagpasigarbo niini ngadto sa uban. Kondili, ang pagpasidungog nga gihisgotan ni Jesuskristo mao ang pagtoo kaniya nga siya pinadala sa Amahan ug nga sila motahan sa iyang mga pagtulun-an nga sinugo sa Amahan.

Ang mensahe sa ebanghelyo karong adlawa mao ang pagtawag kanatong tanang mga kristohanon sa pagtoo ngadto kang Jesuskristo; nga Siya Diyos nga matuod ug Anak sa Diyos nga Amahan. Kita giawhag sa pagpasidungog kaniya nga piniling binuhat nga walay sama, Ginoo nga madasigon ug prinsipe sa pakigdait. Kita giawhag sa pagpasiduggog kaniya aron sa maong paagi kita usab makapasidungog sa Amahan. Apan sa unsa mang paagiha nato pagasidunggan si Jesus ug sa unsang paagiha nato ikapakita ang atong pagtoo kaniya.

Diha sa atong ebanghelyo gitudluan kita ni Jesus sa pagpasidungog. Siya nagkanayon: “Ang mamati sa akong gisulti ug motou kaniya nga nagpadala kanako, may kinabuhing dayon.” Nga sa ato pa, kita nga nakadungog sa pulong sa Diyos nga gisulti ni Jesuskristo dili nato kini isalibay ug palabyon lang sa pikas dunggan kundili patuhopon sa atong tagsa tagsa ka mga kasing-kasing. Ang tinoud nga nagpasidungog kang Jesuskristo kinsa Anak sa Diyos dili kadtong mga pariseo; dili kadtong mga magtutudlo sa balaod nga nagtuman sa mga kasuogan ug sa mga pagtulon-an sa templo apan walay sulod ang mga kasing-kasing. Sila kadtong mihukom kaniya sa kamatayon, sila kadtong mitaral ug mibun-og kaniya sa haligi nga bato; sila kadtong mibiay-biay ug miduslak kaniya sa kamatayon. Sila kadtong mga walay kasing-kasing.

Sama sa atong panahon, ang mga tawong wala nagpasidungog kang Jesukristo mao sila kadtong nagpabilin sa kahakog sa bahanding kalibutanon, sila kadtong midaog-daog sa kabus, sila kadtong miguba sa kinaiyahan ug mipanday ug mga balaodnon nga batok sa kinabuhi, sila kadtong miabusar sa gahum ug mipakaylap ug inhustisya, sila kadtong nagpuyo sa kangitngit sa kasal-an. Sila kadtong mga walay kasing-kasing.

Niining panahon sa kwaresma, atong ipadayon ang atong pagpamalandong sa atong mga kaugalingon. Gamiton nato kining kahigayonan sa pagbalik ngadto sa Anak sa Diyos, si Jesukristo, kinsa mao ang tuburan sa gugma ug kapasayloan. Gamiton nato kini nga panahon sa pagpamati sa mga Pulong sa Diyos ug pagpatuhop niini diha sa atong mga kasing-kasing. Si Jesus nagkanayon: “Taliabot na ang panahon, ug kini miabot na. Wala akoy mahimo sa akong kaugalingon; maghukom lamang ako sumala sa gisulti sa Diyos kanako, busa ang akong hukom matarong kay wala man ako magtinguha pagbuhat sa akong kabubut-on, kondili sa kabubut-on sa nagpadala kanako.” Mao unta kini ang sukaranan sa atong mga buhat, ang pagsunod sa kabobot-on sa nagpadala kanato. Amen!

Ang Pagsunod Sa Balaod

Ang Pulong sa Kinabuhi karong adlawa mao ang pagsunod sa balaod sa Diyos. Sa laing bahin sa kasulatan gipahimangnoan kita ni Kristo nga ang tawo wala gimugna alang sa balaod kundili ang balaod gimugna alang sa kaayohan sa tawo. Kining maong tawag sa pagmugna sa balaod alang sa kaayohan sa tawo mao ang nahimong tema o unod sa atong ebanghelyo karong adlawa.

Si Jesus nagkanayon mianhi ako dili aron sa pagsalikway sa Balaod ni Moises ug sa mga pagtulon-an sa mga propeta kundili aron paghatag niini og hustong kahulugan. Atong masabtan nga ni Jesus sa iyang pag-anhi sa kalibutan wala magbungkag sa balaod sa daang kasabutan kundili nagtuman niini. Mianhi siya aron pagtudlo kanato sa saktong kahulugan sa balaod. Dili sama sa mga pariseo ug sa mga magtutudlo sa balod nga nagasunod gayud sa balaod letra por letra, si Jesus nagatudlo kanato nga ang pagpangita og kahulugan sa balaod mao ang dili dayon nga pagsunod niini kundili ang pagpatuhop una niini ngadto sa atong mga kasing-kasing.

Ang pagpasabot nga gipunting sa atong Ginoong Jesukristo mao ang kinasingkasing nga pagdawat sa balaod una ngadto atong mga kasing-kasing sa dili pa kini nato pagasundon ug pagatumanun. Ang pagsunod sa balaod nga walay pagsabot susama sa usa ka tawo’ng naglakaw nga walay dereksyon. Ang pagsabot sa balaod nagpadayag sa atong pagka-gawasnon nga binuhat ug kini mao ang magagiya kanato ngadto sa saktong dalan.

Ang mga pariseo misunod sa balaod sa katigulangan dili tungod kay kini nasabtan na nila pagayo, o di kaha tungod kay kini gidawat na nila sa ilang mga kasing-kasing, hinonoa, misunod ang mga pariseo, ingon man ang mga magtutudlo sa balaod sa tulumanon ni Moises tungod kay mao kini ang sugo sa ilang kultura, sugo sa ilahang namat-ang katilingban. Misunod sila tungod kay gisunod kini sa ilang katigulangan. Tataw ang pagkawagtang sa ilang pagkagawasnon diha sa ilang pagpili sa Diyos ug paghigugma sa iyang kasugoan. Dili kini mao ang kabobot-on sa Diyos alang kanatong iyang hinigugmang katawhan mga binati kung kaigsoonan. Wala gimugna ang balaod aron sa pagsakit sa tawo, wala kini gimugna aron sa pagpugos sa tawo, kundili aron makakita ang tawo sa iyang bili og importansya diha iyang paggamit sa gasa sa kagawasan.

Ang panahon sa kwaresma, panahon nga gimugna sa Simbahan aron sa pagusisa ug pagpamalangdong balik sa atong mga kaugalingon. Dili malikayan nga diha nga niining maong panahon kita gihatagan og mga nagkadaiyang mga dekreto o liturikanhong mga tulumanon o mga butang nga angay pagasundon o pagabuhaton sama pananglit sa pagpuasa, pagpamalandong ug pag-ampo, paghatag ug kaayohan sa uban pagtuman sa mga tulumanon sa simbahan ug uban pa. Kining mga butanga gibuhat ug gisunod sa mga pariseo sa ilang panahon subay sa kulturanhong prinsipyo, kita ba usab nagabuhat niining mga butanga pinasikad sa mando sa atong katigulangan o tungod kay kita nakakita sa bili niini ug nakasabot sa kahulugan niini diha sa atong tagsa-tagsa ka mga kasing-kasing. Ang pagsunod sa balaod sa kwaresma dili alang sa diyos kundili alang sa atong kaayohan. Ang paghatag og higayon sa atong kaugalingon pinaagi sa puasa nagalimpyo kini sa atong lawasnong kahugaw. Ang paghatag ug kahigayonan sa atong kaugalingon diha sa sakramento sa kumpisal nagalimpyo sa atong kalagnong kahakog og kapakyasan ug naga-andam sa atong espirituhanong pagbalik ngadto kaniya. Ang paghatag ug kahigayon sa pag-ampo ug pagtabang sa uban nagahingpit sa atong kristohanong kinaiya ug nagkumpleto sa atong langitnong pangandoy.

Atong ibutang sa atong mga huna-huna ug kasingkasing nga ang pagsunod niining mga tulumanon dili tungod ug alang sa relihiyon o sa atong mga katigulangan sukad pa kaniadto kundili tungod ug alang sa kahingpitan sa atong pagkagawas’nong nilalang sa Diyos. Ang pagsunod niining mga tulumanon magatultol kanato sa pagkaplag pagbalik sa atong kaugalingon diha sa Diyos’nong panon.

Si Jesus nagkanayon mianhi ako dili aron sa pagsalikway sa Balaod ni Moises ug sa mga pagtulon-an sa mga propeta kundili aron paghatag niini og hustong kahulugan. Ug ang kahulugan niining maong mga tulumanon mao ang pagsunod niini uban ang lawom nga pag-sabot sa atong mga huna-huna ug ang mahigugmaong pagdawat niini diha sa atong mga kasing-kasing.

Hinaut unta nga kita mosunod sa mga tulumanon sa kwaresma dili tungod kay kini atong tradisyon kundili tungod kay kini mao ang paghingpit sa akong pagkasumusunod ni Kristo. Amen.

Mierkoles sa Badlis: Pagsugod sa Panahon sa Kwaresma

Karong adlawa mao ang Miyerkoles sa Badlis – ang unang adlaw sa atong pagbukas ug pagsaulog sa lain na usab nga panahon sa Liturhikanhong Kalendaryo sa atong Simbahan – kini ang panahon sa Kwaresma. Ang pulong sa kinabuhi nga atong pamalandungan karon adlawa mao ang Puasa, Pag-ampo ug Paghatag og amot ngadto sa kabus.

Unang Pulong Pag-puasa. Ang puasa usa ka paagi sa paglimpyo sa atong lawas ug paglig-on sa atong kalag. Kini usa ka mahinungdanung tradition sa atong Simbahan diin kita giawhag sa paglinis sa atong pisikal nga kinaiya. Sa lain bahin ang puasa sa espirituhanong pagsabot nagkahulugan og padili sa lawasnong gusto o kaayohan ug paglikay sa kalibutanong kahiligan agi’g paghatag og makahuluganong pagtagad sa kalag. Diha sa pagpuasa atong gibusog ang kalag sa iyang kagutom ug diha niini atong gilig-on ang atong espiritu sa Diyosnong pagsalig. Tuod man ang tawo dili mabuhi sa pan lamang kondili sa matag pulong nga gibungat sa Diyos. Diha sa atong pagpuasa atong gipuno ang kalag sa mga butang espirituhanon nga maoy naglig-on sa atong espiritu ug nagpatunhay kanato ngadto sa kinabuhing dayon.

Ikaduhang Pulong Pag-ampo. Ang kahingpitan sa atong pakipag-relasyon sa Diyos mao ang atong pag-ampo. Kini usa ka paagi diin kita nakighimamat sa Diyos diha sa atong mga kasing-kasing. Ang pag-ampo usa ka mahinungdanong kahigayonan sa panagtagbo sa duha ka gugma – ang gugma sa tawo nga nagkinahanglan sa Diyos ug ang Gugma sa Diyos nga wala’y laing gipitik kundili ang tawo. Kining panaghimamatay sa Diyos ug sa tawo nahitabo lamang diha sa pag-ampo. Ang Diyos sa iyang dakong gugma sa tawo wala mobiya sa tawo. Sa kanunay bukas ang mga ganghaan sa Diyos alang sa tawo nga gustong mosulod ug moambit sa kahimayaan. Kining maong ganghaan mao ang atong mga pag-ampo ug pakighinabi Kaniya. Mahimo lamang kitang suod sa Diyos kung kita nagapadayon ug nagmakanunayon diha sa atong mga pag-ampo.

Ikatulong Pulong Paghatag ngadto sa Kabus. Ang atong gugma sa Diyos mamahimong mga pulong nga walay unod o walay bili kung kini dili nato saktan ug konkretong buhat sa kalooy. Matud pa sa sulat ni Santiago, ang pagtoo nga walay buhat usa patay nga pagtoo. ‘Faith without action is dead.’ Tuod man ang gugma kung walay buhat, usa kini ka patay nga gugma. Nan ang paghatag ug kinabuhi niining maong gugma mao ang pagbuhat ug mga acktual o konkreto nga mga sakrispyo dili alang sa atong kaugalingon kundili alang sa uban, ilabi na ang mga kabus. Mahinungdanun ang mga kabus sa mata sa Diyos, tungod kay ang Diyos nga nagpakatawo nga si Jesus, sa iyahang pag-anhi sa kalibutan mipili man sa situasyon nga kabus. Kini aron maipangita sa kalibutan nga ang Diyos nahigugma sa tanan. Kining maong gugma nga buhi diha sa kasing-kasing sa Diyos buhion ta usab diha sa atong mga kasing-kasing pinaagi sa pagtagad, paghatag ug pagpakabana sa mga ubos ug kabus natong mga kaigsoonan.

Mga binati kung mga kaigsoonan, ang ebanghelyo karon adlawa nagpunting niining tutulo ka punto nga atong gipamalandongan karon – Puasa, Pag-ampo, Paghatag. Kini mao ang kinatibuk-an kahulugan sa kwaresma. Niining kwarenta ka adlaw diin kita mamalandong, maghinulsol ug mubalik ngadto sa Diyos agi’g pagpangandam sa pagsakit, pagkamatay ug pagkabanhaw sa atong Ginoong Jesukristo, atong tagaan ug mahinungdanung pagtagad ang pag-puasa – ilabina karon adlawa Miyerkoles sa Badlis ug Biyernes Santo, atong hatagan og kakugi ang pag-ampo ilabina ang Via Crucis agi’g pag-unong ug pagsubay sa dalan sa kapaitan ni Jesus paingon sa Kalbaryo, ug atong hatagan og makahuluganong pag-abiabi ilabina ang mga kabus pinaagi sa atong kinasing-kasing nga pagtunol og mga hinabang kanila dili tungod kay sobra kini kanato kundili tungod kay kini man ang atong responsibilidad isip mga kristohanon.

Kining tutulo ka mga buhat, Puasa, Pag-ampo ug Paghatag dunay mahinungdanong kalambigitan sa matag usa. Diha sa atong pagpuasa atong gidisiplina ang atong lawasnong kahiligan o gusto ug mihatag kita ug panahon sa pag-ampo. Ug diha sa atong pag-puasa, pinaagi sa dili pagkaon, migahin kita og mga butang o salapi nga atong ikahatag o ikapaambit ngadto sa labaw nga nagkinahanglan niini. Kining tutulo ka espirituhanong pagdisiplina mga pamaagi aron kita sa hingpit makasaulog kwaresma nga mabulokon, mabungahon ug makahuluganon.

Uban sa grasya sa Diyos, atong pangayoon ang iyang giya kanato tanan niining atong hiniusang pagtahak sa balaanong panahon sa Kwaresma! Amen.

Diyosnong Hagit

Ang Pulong sa Kinabuhi nga atong pamalandungan karong adlawa mao ang Diyosnong Hagit. Sa matag kinabuhi sa tawo, kini gialirongan sa mga nagkadaiyang hulagway sa hagit sa kalibutan. Alang sa uban ang kalami sa kinabuhi sarang masinati lamang kung ang maong pagpuyo’ng tawhanon o kalibutanon gikuso-kuso sa balod sa kapit-os ug sinuwayan sa ligid sa kapalaran. Sa basahon ni Sirach, ginaingon didto nga “Gold is tested in fire.” Masuta lamang ang kamatuod sa bulawan kung kini moagi sa makuting proceso sa pagtunaw diha sa kalayo. Tuod man ang kinabuhi sa tawo masuta lamang ang balor o kabililhon o di kaha ang kalami niini kung ang maong kinabuhi misinati sa kapit-os ug kalisdanan. Ang mga hagit sa kinabuhi mao’y midugang sa dayan-dayan o kolor niini ug nga ang kawala niining mga butanga, ang kinabuhi mamahimong laay, puol ug mingaw.

Ang atong kinabuhing Kristohanon dili lingkawas niining mga hagit. Mga hagit nga mibaid sa atong pagtoo, milig-on sa atong paglaum ug mipatunhay sa atong gugma. Sa matag karon og unya kita naga-atubang ug mga hagit nga atong sagubangon niining kinabuhi sa kasantos. Ang ebanghelyo karong adlawa nagsaysay og usa ka dakong pahimangno ngadto sa mga piniling apostoles ni Jesus.

Sila nagkanayon, “Magtutudlo, nakakita kami og tawo nga naghingilin ug yawa sa imong pangalan, sanglit dili man siya kauban nato, gibadlong namo siya.” Ang karakter sa mga apostoles tipikal nga tawhanon. Tipikal nga nagpakita nga kami lamang ang dunay katungod sa pagbuhat nianang mga butanga kay kami lamang ang pinili sa Diyos, kami lamang ang gitahasan sa Diyos, kami lamang ang gipeyalan sa Diyos. Usahay aduna kita’y ingon niini nga karacter o mentalidad. Kami lamang ang adunay katungod, kami lamang ang adunay gahum, kami lamang ang adunay opportunidad; kami lamang og wala na’y lain pa.

Apan ang karakter o mentalidad sa mga apostoles dili karacter o mentalidad ni Jesus. Ayaw sila’g did-i kay wala’y tawo nga magbuhat og milagro sa akong ngalan nga makasulti’g dautan batok kanako. Kining maong mga pulong ni Jesus misumbalik ngadto sa mga apostoles kansang pagtan-aw sa ilang kaugalingon hataas, gamhanan, ug hawod. Kining maong mga pulong ni Jesus mihagit sa mga apostoles sa pagpamalandong pagbalik sa ilang kaugalingon ug sa ilang gigikanan. Ang maong panghitabo nagpalawom sa ilang panlantaw ug anaa karon sa ilang mga huna-huna ang kamatuoran nga dili lang diay sila ang bulahan, dili lang diay sila ang pinili tungod kay anaay uban nga nagbuhat sa parehas nga misyon nga gitugtan ni Jesus.

Gibuhat kini ni Jesus dili aron sakiton ang iyang mga piniling apostoles o di kaha iya kining pakaulawan. Gibuhat kini ni Jesus aron paghagit kanila sa ilang pagkapinili. Gihagit niya sila sa pagsabot nga ang misyon sa pagpakaylap sa gingharian sa Diyos dili lamang para ug alang sa mga piniling apostoles, “the chosen 12,” kundili ingon man ngadto sa bout nga mopakaylap niini. The mission of spreading the good news of the Kingdom and the propagation of the Name of Jesus to all corners of the world is not an exclusive right of the 12 but an inclusive undertaking of all who wish to share the mission.

Kini nagpasabot ug ngapakita sa kahalad sa buhat sa misyon alang sa katukuran sa Gingharian sa Diyos. Ug kitang tanan gitawag sa pagtabang aron atong saw-an ang maong misyon. Bout sa Diyos nga kitang tanan maluwas ug nga kitang tanan makasinati sa langit, apan ang kalampusan niining maong misyon naga-agad sa atong aktibong pagpangilabot sa buhat sa kaluwasan.

Ang mensahe niining maong ebanghelyo karon mao ang paghagit natong tanan mga magtutuo ni Kristo wala lamang kanato ang katungod sa paghawid sa ngalan ni Jesus, si Jesus mismo naga-abli sa iyang kaugalingon ngadto sa uban kansang kasing-kasing andam nga modawat ug magpapuyo kaniya. Kay matud pa ni Jesus, “si kinsa kadtong dili batok kanako, dapig kanako”! Mao kini ang Diyosnong hagit nga atong pagapamalandungan karon! Kung kita dili batok kang Kristo, dapig ba kita kang Kristo?

Amen!

Ang Espirituhanong Pagkakita

Ang Pulong sa Kinabuhi karong adlawa mao ang Espirituhanong Pagkakita. Gisaysay sa atong ebanghelyo ug ato kining nadungog kung giunsa ni Hesus pagpahibalik ang panan-aw sa usa ka buta human kini Niya hikapa ug gitapion ang iyang kamot sa maong tawong buta. Bisan tuod og dili na kini bag-o, ang pagpang-ayo ni Hesus ug sa iyang paghimo og mga katingalahang mga butang, ang ebanghelyo karon adlawa nagdasig kanato sa paggamit sa atong mga mata sa pagtan-aw. Si Hesus nangutana sa tawo nga buta, “May nakita ka ba?”

Mga hinigugma kung mga kaigsoonan sa pagtoo, niining atong pagpadayon sa paglawig niining panaw sa kinabuhi unsa man ang atong mga nakita? Unsa man ang atong mga nahimamat? Ug unsa bay atong gibuhat sa atong mga nakita ug mga nahimamat?

Sa tumang pag-antos sa atong mga kaigsoonan tungod sa kawad-on sa kinabuhi, may nakita ba kita? Sa mga inhustisya nga nahiaguman sa uban natong mga kaigsoonan tungod sa kalaog sa uban nga mga adunahan, may nakita ba kita? Sa nagkadaghan ug nagkalawom nga problema sa korupsyon sa atong pang-gamhanang local, probinsyal o national, korupsiyon sa nagkadaiyang ahensya sa atong pamunuan, sa katilingban ingon man sa Simbahan, mga lider nga nagpakatagbaw ug nagpakadato gamit ang salapi sa katawhan, may nakita ba kita? Sa mga abuso nga sarang gipahamtang sa mga tawo nga anaa sa gahom ngadto sa mga yanong mga sumusunod, may nakita ba kita? Sa dili makiangayon ginansya nga napupo sa mga dagkong establistamento pinaagi sa pagpanlimbong ug pagpanghadlok ug sa dili makatawhanong pahat o bahin nga nadawat sa matag trabahante o mamumuo human silang magsilbi sa sakto ug tininuod gayod, may nakita ba kita?

Ang pangutana ni Hesus sa tawong buta mahimo usab nga panguta ni Hesus sa mga tawo niining atong panahon karon nga nagpabuta-buta ug nagpabungol-bungol sa kahimtang sa atong ubos nga mga kaigsoonan. Usa usab kini ka pangutana nga nagdala ug pamukaw sa mga tao nga anaa sa posisyon apan nakatulog sa ilang katungdanan sa pagpanalipod sa kamatuoran, pagpalawig sa kaangayan ug pagpakaylap sa katarung nga maoy una ug sinugdanang tumong sa katukuran sa katilingban. Ang maong pangutana ni Hesus usa usab kini ka pangutana nga nagdala ug pagsaway sa mga tawo kansang kasing-kasing walay gugma ug pakabana sa iyang isig ka ingon.

Sa pangutana ni Hesus, “may nakita ka ba?” ngadto sa tawong buta, buot ipasabot ni Hesus ang pisikal nga pagkakita. Apan kung ato kining sabton sa koteksto sa atong panahon karon bout ipasabot sa atong Ginoo ang espitirtohanun nga pagkakita nato sa daghan ug nagkadaiyang matang sa kasakit sa atong mga kaigsoonan karon.

Ang espirituhanon nga pagkakita nagpasabot nga kita wala lamang nakakita sa kahimtang sa kabus kundili mitagad niini, nga kita wala lamang makadungog sa yango-ngo sa inhustisya kundili mitubag sa atong mga nadunggog, nga kita wala lang makabati sa kasakit ug kahago sa yanong mamumuo kundili mipaabot sa saktong suhulan subay sa gimantala sa lagda sa atong balaod. Ang espirituhanon nga pagkakita mao ang pagkakita inubanan sa huna-huna nga masinubtanon ug maunongon ug inubanan sa kasing-kasing nga malumo ug maloloy-on. Ang espirituhanon nga pagkakita mao ang pagkakita sa Diyos diha sa kahimtang sa uban.

May nakita ka ba? Usa kini ka dako nga pangutana nga ipangutana unya sa atong Labaw’ng Makagagahum sa adlaw sa paghukom. Pangutana nga dili nato malimdan, pangutana nga dili nato maikyasan. Ang tubag sa maong pangutana atong buhaton dili ugma, dili sa sunod adlaw, ug dili sa adlaw sa paghukom, kundili atong buhaton karon adalawa sa mga ginagma’yng mga paagi nga kita nakapahimout ug nakapa-ambit sa atong mga igsoonan. Usbon ko ang tubag sa maong pangutana, “May nakita ka ba?” unta atong buhaton karong.

Amen.

Ang Tinuod nga Kahinlo

Ang pulong sa kinabuhi karong adlawa mao ang tawhanong kahinlo. Ang kultura sa mga hudiyo nagtudlo nga sa matag higayon nga sila mokaon, importante ang seremonyas sa paghugas. Kining maong pagtulun-an kinutlo gikan pa sa “Rabbis of the Talmud” diin giawhag ang matag Judeo sa paghugas sa kamot sa dili pa sila muhongit ngadto sa ilang baba sa mga pagkaong gitugot sa ilang balaod. Kining maong naandang panggimbuhaton nga gihimo sa mga Judeo nagsugod sa dugay na nga panahon ug nahimo na kining kabahin sa matag kinabuhi ug sa matag katilingbang Hudiyohanon.

Atong masabtan ang kapungot sa mga pariseo ingon man ang mga pagsaway sa mga magtutudlo sa balaod kang Hesus tungod kay una sa tanan, si Hesus usa ka Judeo. Ug isip sakop sa maong lahi o kaliwatan kinahanglan nga mosunod siya sa bisan unsang gilathala sa ilang balaod.

Ang ebanghelyo karong adlawa nagtubag sa mga daghang pangutana, sagul pagtuis, sa mga pariseo og sa mga magtutudlo sa balaod ngadto kang Hesus sa iyang pagpakita’g wala’y respeto sa balaanon og halangdong Balaod nga Hudiyohanon. Si Hesus sa ebanghelyo nagkanayon: “Bisan unsa ang mosulod sa baba sa tawo dili makahugaw kaniya.” Kining maong mga pulong ni Hesus mahimong sabton nga pagsupak sa balaod sa kahinlo. Mahimong tan-awon o sabton nga si Hesus bout mogun-ob sa balaod sa katiguwangan.

Apan nasayod kita nga sayop ang pagsabot sa mga tigpakaaron-ingon, ang mga pariseo ug mga magtutudlo sa balaod tungod kay wala sila makatuhop sa bout nga ipasabot ni Hesus. Gipasabot ni Hesus sa ebanghelyo nga ang kahinlo sa tawo wala lamang masukod sa iyang gihungit o sa iyang gikaon. Ang kahinlo sa tawo wala lamang masukod sa kalimpyo o kahugaw sa kamot nga gigamit sa paghungit. Bout ipasabot ni Hesus nga labaw sa kahugaw nga mopatay sa lawas, aduna pay mas labaw nga kahugaw nga dili lamang modaut sa lawas kung dili mopatay usab sa kalag.

Maisugong mipahimangno si Hesus nga ang makapahugaw sa tawo dili kadtong musulod sa baba kung dili kadtong mugawas sa kasing-kasing. Ang basahon sa Genesis nagtudlo kanato nga mimando ang Diyos “sa pagkaon sa tanang matang sa bunga sa kahoy.” Nga sa ato pa dili makapahugaw sa tawo ang iyang gikaon tungod kay kini hinimo sa Diyos. Hinoon ang makapahugaw sa tawo mao kadtong iyang gibungat ug gibuhat nga mga dautan ngadto sa iyang isig-katawo.

Mga binati kung mga kaigsoonan, kita gipahinumduman sa ebanghelyo nga atong nadungo’g nga dili ang baba ang sukaranan sa kalimpyo o kahugaw sa tawo kundili ang sulod sa iyang kasing-kasing. Ang kasing-kasing mao’y sarang nga mopaila kanato kung unsang matanga kita sa pagkatawo. Tugod kay diha sa kasing-kasing naggikan ang kapungot, kahakog, pagkamahitas-on ug garbo sa tawo. Kung kining mga butanga mihari o mipuyo sa atong kasing-kasing, ilhon kita nga hugaw sa mata sa Diyos bisan paman ug kaliboan nga higayon kita maghugas sa atong kamot.

Sa laing bahin, diha usab sa kasing-kasing sa tawo gikan ang mga maayong mga hiyas sama sa pagkamahigug-maon, pagkamanggihatagon, ug pagkamapaubsanon. Og nga kung kining mga butanga mihari ug mipuyo sa atong tagsatagsa ka mga kasing-kasing, ilhon kita sa Diyos nga hinlo bisan paman sa kahugaw sa atong gipanghungit.

Mga binati kung mga kaigsoonan, uban sa grasya sa Diyos pangayoon nato Kaniya ang tinoud nga kahinlo ug nga unta niining atong pagpuyo ug sa atong pagpadayong paglawig niining atong kinabuhi padulong ngadto Kaniya magbaton unta kita ug malinis nga kasing-kasing kay ang langit maabli lamang alang kanila nga aduna niini! Amen!

Ang RH Bill ug Ang Kaalaotan Niini

Ang Pulong sa Kinabuhi karong adlawa mao ang Maayong Balaod, Balaod sa Diyos. Unsa ba ang sakto nga balaod? Pagtabang ba o pagdaot? Ang pagluwas ba sa kinabuhi sa tawo o pagpatay? Kining maong mga pangutana nagpunting ngari kanatong mga tawo. Kay unsa ba para kanato ang balaod? Para asa man ang mga balaod ug para kang kinsa man kini?

Usa sa mga mainitong gituki ug gidebatihan karon sa atong Camara de Representante ug ingon man diha sa Senado mao ang pagpanday sa balaodnon mahitungod sa Reproductive Health. Nailhan kini isip RH Bill No. 5043 nga gitawag usab og Reproductive Health and Population Development Act of 2008. Usa sa mga tumong niining maong balaod mao ang pagtugot sa paggamit og mga artificial contraceptions aron mapugngan ang pagpanganak ug ang pagdaghan sa mga tawo sa atong nasud. Bisan tuod maayo ang ubang parte o bahin sa maong balaod-non pinaagi sa paghatag og igong proteksiyon sa mga kababainhan, edukasyon sa kabataan og kabatan-onan ug sakto nga pagplano sa pamilya sa mga magtiayon, ang maong balaod-non ug ang kinatibuk-an niini wala magtabang sa tawhanong sitwasyon hinoon midaot niini, wala kini magluwas sa tawo sa iyang kahimtang, hinoon mipatay sa kinabuhi nga hinatag sa Diyos.

Sukad pa sa sinugdanan, ang simbahan maisogung misupak niining maong balaod-non, dili tungod kaya ang simbahan nagpakabuta o nagpakabungol sa kahimtang sa kalibutan, ang hinanaling pagdaghan sa katawhan og ang paspas nga pagdaghan sa mga kabus dinhi sa atong nasud nga Pilipinhon, kundili misupak ang simbahan tungod kay siya nakakita sa pagkadepektoso niini maong balaod-non ilabina diha sa natad sa moralidad. Ang Simbahan nga tinukod ni Kristo, tinugyanan sa pagbantay ug pagdepensa sa pagtoo ug moralidad nga maoy naglangkop sa iyang misyon dinhi sa kalibutan. Namatyagan sa atong Simbahan ang pagkadepektoso niining maong balaod-non nga maoy nagtukmod sa pisikal, emosyonal og spiritual nga kaalaotan sa tawo kung ugaling ang maong balaod-non mamahimong hingpit nga balaod. Usa kini ka dakong kaalaotan nga mogun-ob sa kinabuhi karon ug sa sunod nga generasyon tungod kay kini wala mahisubay sa balaod ug sa kagustuhan sa Diyos.

Ang Diyos mao ang sinugdanan sa tanan, og nasayod ang Diyos labaw pa sa atong kaalam kung unsaon pagsulbad niining mga suliran nga nagpalibog sa tawo. Ang paggamit og mga butang nga dili natural, bisan unsang paagi, bisan ug kini luwas kon safe, kay kini artificial man, ginama sa tawo lamang og dili natural, aduna gayod kini dautan nga epekto, mga epekto nga dili ikaayo sa tawo.

Ang paggamit sa condom, pills, cervical cup, IUD ug uban pang artificial contraceptions ug ang atong pagtugot sa sterilizations, sama sa vasectomy o ligation mga butang nga dili natural. Wala magpasabot nga ang simbahn supak gayud sa kinatibuk-an niini, adunay mga pagtugot nga gihatag sa simbahan sa mga situwasyon nga di ordinaryo, human usisaha pag-ayo ug human sa hataas ug makuti nga pagtuon ug tungod og alang sa kaluwasan sa kinabuhi sa pasyenti gitugtan sa paggamit niining mga butanga ubos sa mga nagkadaiyang prinsipyong moral subay sa Balaod sa Kinaiyahan o Natural Law.

Apan kung ang paggamit niining mga butanga, niining mga artificial contraceptions aron sa pagkutlo sa nagdaghang katawhan, o population control, usa kini ka derektang pagpugong sa kinabuhi, pagsupak sa kabobot-on sa Diyos. Nagpugong kini sa pagpakaylap og kinabuhi, ug kay pinaagi sa artificial contraceptions gikutlo man sa tawo ang Diyosnong plano sa paghimo og kinabuhi nga maoy usa sa mga mahinungdanong tumong sa kaminyoon, ug maoy mahinungdanung tumong sa buhat sa minyo sa mga magtiayon, si Papa Paulo Sies, nagkanayon sa iyang sulat encyclical Humanae Vitae, midaot kini sa kinatibuk-ang plano sa Diyos og kini dakong pagsupak Kaniya, kinsa maghahatag sa kinabuhi. “If they further reflect, they must also recognize that an act of mutual love which impairs the capacity to transmit life which God the Creator, through specific laws, has built into it, frustrates His design which constitutes the norm of marriage, and contradicts the will of the Author of life.”

Kung ang usa ka balaod-non sukwahi sa kabobot-on sa Diyos wala kini katungod nga mamahimong balaod, ug labaw sa tanan kung ang usa ka balaod sukwahi sa kabobot-on sa Diyos, wala kita’y katungdanan sa pagsunod nianang maong balaodnon.

Si Hesus sa atong ebanghelyo karon nagkanayon, para asa ba ang balaod? Kini ba aron sa pagluwas sa kinabuhi o pagpatay niini? Para asa ba ang RH Bill, para ba gayud kini sa kaluwasan sa tawo o sa iyaha hinoong hinanaling kaalaotan.

Pangayoon nato ang giya sa Espiritu sa Kalaam nga molamdag unta sa atong huna huna ug kasing-kasing aron kita maisugon sa pagpanalipod alang sa kaayohan ug kalamboan sa kinabuhi. Amen.

Ayaw Kahadlok

Ang pulong sa kinabuhi kanato karong adlawa mao ang pag salig sa Diyos. Sa ebanghelyo nga atong nadungog dayag nga misulti si Hesus ngadto sa mga nangalisang niyang mga tinun-an, “ayaw kamo kahadlok, salig kamo, ako kini.” Mao kini ang mga pulong nga puno sa pagpakabana gikan sa usa ka Diyos ngadto sa iyang mga katawhan. Mga pulong nga puno sa pagdasig, puno sa pag-amuma ug puno sa pagpangga. Mga pulong nga makapatindog kanato pagbalik, human kita masukamud sa atong pagpakasala, human nato biyai ang kaayo og mipuyo uban sa dautan, ug human nato pilia ang kangingit sa atong tawhanung kahuyang imbes nga atong puy-an ang kahayag sa kasantos. Human niining tanan, ang Diyos nga si Hesus, miingon, “Ayaw kamo kahadlok, salig kamo, ako kini.”

Sa kalibutan nga atong gipuy-an karon nagkadaiya ang hulagway sa pagsalig. Daghan ang mulingla kanato sa pagsalig kanila ug pagsalig niining mga butang uban ang daghang mga saad nga kaayohan nga ilang mahiaguman aron maihatag lamang kanato ngadto kanila ang atong pagsalig. Ang uban mitanyag nga mosalig kita sa gahum ug sa salapi maoy hinungdan nga daghan ang mag-apas, buhaton ang tanan aron lamang magpabilin sa gahum ug daghan ang maninguha sa pagtigum ug mga bahanding kalibutanon kay kini kuno ang magdala kanila sa kasiguruhan sa kinabuhi. Gipahinumduman kita ni Hesus sa ebanghelyo karon, “Ayaw kamo kahadlok, salig kamo, ako kini.”

Ang tinuod nga kasiguruhan sa kinabuhi dili ang mga butang nga lumalabay lamang, dili mga butang nga hinimo sa tao kundili si Hesus mismo. Sa atong kinabuhi nangahadlok kita sa daghang mga butang, nangahadok kita tungod kay ato mang gitagaan ug bili ang atong mga butang sa kinabuhi. So because we give value to many things, we are now afraid as to lose these things. Nagtigum kita ug daghang mga multo diha sa atong kinabuhi og muabot ang maong adlaw diin maniyagit kita sa kahadlok sa mga multo nga kita ra pod ang naghimo. Sama sa mga apostoles, nangahadlok ug naniyagit sila sa naglakaw sa tubig tungod kay sila sumusunod lamang ni Hesus ug wala mopuyo sa pagsalig ni Hesus. “Ayaw kamo kahadlok, salig kamo, ako kini.”

Mga binati kong kaigsoonan ni Kristo, ang kahingpitan sa atong pagsalig sa Diyos mao ang atong tim-os nga paghigugma kaniya. Sa Unang sulat ni San Juan, siya nagkanayon, ang Diyos gugma ug ang nagkinabuhi subay sa gugma anaa sa Diyos ug ang Diyos anaa kaniya. Kini nagpasabot nga unta sa atong inadlaw-adlaw nga kinabuhi mohimo kita’g mga butang bisan ug ginagmay nga mga butang nga nagagikan sa atong mga kasing-kasing; nagagikan sa atong paghigugma sa Diyos. Mohimo unta kita’g mga butang nga dili pakapasakit sa uban, nga dili makapapungot sa uban, nga dili makadaot sa uban; hinoon, mga butang nga mag-agni sa uban nga mopuyo sa pagkamaayo, sa pagkamasaligon, ug sa pagkamahigugmaon. Kung kining mga butanga nahitabo sa atong kinabuhi, wala kita’y angay nga kahadlokan, wala kita’y angay nga kalisangan tungod kay ang naghari sa atong kasing-kasing ug sa atong kinabuhi, mao man si Hesus.

Niing atong pagsulod sa bag-ong tuig ato unta puy-an nato ang mga pulong sa atong Ginoo, “Ayaw kamo kahadlok, salig kamo, ako kini.” Amen.