Ang Pagbasa sa Atong Panahon

Ang pulong sa kinabuhi karon adlawa mao ang atong pagkamainabtikon sa pagbasa sa signus sa atong panahon. Sa milabay nga daghang katuigan, dili nato ikalalis nga adunay daghang mga butang nga naangabag-o dinha sa atong kinabuhi ingon man sa kalibutan nga atong gipuy-an karon. Mga kabag-ohan dala sa paspas kaayong kauswagan diha sa nagkadaiyang aspeto sa kinabuhi sa tawo, (social, political, economiya og ingon man sa personal nga lebel) nga mao’y hinungdan nga ang tuyok sa kalibutan arang na gayud ka dali ug kapaspas. Tungod sa kapaspas niini, daghan ang mga nangalibog, nangabalaka ug nagpangutana. Lisod ang atong panahon karon, tungod sa kapaspas niini, og kun dili kita magmatngon, dili nato mabantayan nga nahuman na diay kita sa atong panaw.

Ang ebanghelyo ni San Lucas karong adlaw nagpahinumdum kanato sa atong tawhanong kaantigo, kaalam og kahanas. Kaantigo tungod kay sa atong edukasyon nga napupo, gitudloan kita sa pagtan-aw sa mga butang sa kalibutan og unsaon kini sa paggamit alang sa kalamboan ug kauswagan. Ang edukasyon naghatag kanato ug kaalam aron kita mamahimong ligdong og kasaligan sa pagsabot ug pagpasabot sa mga butang sa kalibutan nga adunay kahalambigitan sa atong tawhanon nga pagkinabuhi. Ug kining maong kaantigo ug kalaam nagtukmod kanato aron kita mamahimong hawod o hanas (expert) dinha sa mga pagtulunan nga adunay kalabutan sa atong pamuyo, sa katilingban og ingon man sa kinatibuk-an diin kita nahimong inila og popular.

Mao kini mga binati kung mga kaigsonan ang gipasabot sa atong ebanghelyo diin si Hesus misaway sa katawhan sa ilang pagsabut sa dagway sa yuta og sa langit. Si Hesus miingon, “Inigkakita ninyo sa dag-om nga naggagikan sa kasadpan, moingon dayon kamo, moulan dili madugay, ug moulan gayod. Maantigo ang tawo motagna sa dagan sa panahon; maantigo ang tawo mobasa sa mga timailhan niining kalibutana; maantigo ang tawo mobansay-bansay sa mga lihok o aksyon sa kinabuhi. Apan ang dakong pangutana, maantigo ba kaha usab ang tawo mobasa, motagna og mobansay-bansay sa mga butang espirituhanun. Gisaway ni Hesus ang mga Judio ingon man ang mga kadagkoan sa templo ug mga namumuno niini dili tungod sa ilang kahanas og kaantigo sa pagbasa sa panahon ug pagtagna niini kudili gikondena ni Hesus ang ilang pagkatigpakaaron-ingon. Mga tigpakaaron-ingon sila kadtong maantigong mobasa sa dagan sa kalibutan apan walay alamag sa mga butang espirituhanon. Tigpakaaron-ingon sila kadtong maantigo kono mohatag ug solusyon sa atong problema sa kapobrehon, apan wala magasubay sa tinouray nga gabay nga mao ang pagtulun-an ni Hesus. Tigpakaaron-ingon sila kadtong aduna kunuhay pakabana sa kahimtang sa pamilya, ug nagsulong kunohay sa katungod sa mga kababaihan ug kabataan apan nagasuporta diay sa mga programa nga mipatay sa dignidad sa atong pagkanilalang sa Diyos ug miputol sa lubid sa kasantos nga nagbugkos kanato ug sa atong Labaw’ng makagagahum. Tigpakaaron-ingon silang nagpakabana sa tawhanong kahimtang sa tawo apan wala magtagad sa kalagno’ng panginahanglan.

Dili ang pagkamaantigo, ang pagakamaalamon ug ang pagkahanas ang hinungdan kung ngano sila gisaway ni Hesus. Tataw ang hinungdan, tungod kay sila nagpakaaron-ingon sa ilang pagkamalaamon, pagkamaantigo ug pagkahanas. Hesus sa Iyang pagkadiyos nagpaubos ug bisan sa iyang pagkamaalamon ug kaantigohan, nagpabilin Sya’ng nagmasinubtanon ug nagmasulundon sa tawag ug sa kagustuhan sa Amahan. Kay ang tinoud nga kaantigohan kadto maong kaantigo nga nagamit sa pagtuluan ni Hesus. Ang tinoud nga pagkamaalamon kadto maong kaalam nga nagagikan sa kaalam nga hinatag sa Espiritu Santo. Ug ang tinoud nga kahanas kadto maong kahanas ng adunay kahadlok ug pagtoo sa Diyos kinsa mao ang tinubdan og tubaran sa tanan.

Sa makausa pa, ang ebanghelyo ni San Lucas karon adlaw nagpahinumdum kanato sa paggamit sa atong mga tawhanong talento ug kapasidad dili aron lamang sa pagbasa sa kalibutanong mga hudya ug kalingawan kundi usab kini pagagamiton sa kalagnong katisbawan ug espirituhanong kalamboan. Ang atong pagkamaantigo, pagkamaalamon ug pagkahas ato usab nga pagagamiton sa mga butang langitnon aron sa pagsangyaw sa pulong sa Diyos ug sa pagpatunhay sa Iyang Gingharian alang sa kaluwasan sa tanan.

Uban sa grasya sa Diyos, kini ang atong mga panghinaut. Amen.