Ang Gingharian sa Diyos

Ang pulong sa kinabuhi karong adlawa mao ang pagpalawig sa gingharian sa Diyos. Si Hesus nangutana, “Sa unsa ko ba itandi ang paghari sa Diyos? Ug diha sa iyang pagpangutana mihatag siya ug duha ka ehemplo isip tubag sa unsa ang gingharian. Ang ginharian sa Diyos sama sa usa liso sa mustasa ug sama sa igpapatubo sa pan.

Sa panan-aw sa kalibutan ang gihatag nga panag-ingnan ni Hesus sa Gingharian sa Diyos dili mohaom sa unsa ang anaa sa ilang pagsabot. Para sa tawo ang gingahrian sa Diyos usa ka lugar nga maanindot, puno sa dayan dayan, dako, daghan og kalingawan, daghan og mga maanindot nga panan-awon, puno sa kalipay og puno sa kasadya. Toud man tinuod ang maong pagsabot mahitungod sa gingharian sa Diyos, gipili ni Hesus ang hulagway sa liso sa mustasa ug ang igpapatubo sa pan.

Human milabay ang kapin sa duha ka libo ka tuig sa pagkatawo ni Hesus, ang kalibutan giuhaw ug gigutom sa pagpangandoy kanus-a mobalik ang anak sa Diyos sama sa iyang gisaad kaniadto. Adunay kahaw-ang sa kasing-kasing sa tawo sa paghimamat sa Diyos ug nga siya mopuyo uban kaniya ngadto sa iyang Gingharian. Ang kasing-kasing sa tawo sa kanunay nangandoy nga mahiuban og mahiapil sa pundok sa mga bulahan nga sa kanunay nagsadya ug nagadayeg Diyos diha sa Iyang Gingharian. Ang gingharian sa Diyos alang kanila usa ka dakong pangandoy nga kini matuman lamang human sa kalibutanung kinabuhi.

Apan ang dakong pangutana mao, ang gingharian sa Diyos masinati lang ba human sa atong kalibutanong kinabuhi? Si Santa Teresita sa batang Hesus sa iyang sulat nagkanayon nga ang gingharian sa Diyos anaa sa atong tagsa-tagsa ka kasing –kasing, nga sa matag pitik niini, sa matag paghigugma niining maong kasing –kasing nasinati ang katam-is ug tinuuray nga kalipay sa Diyosnong Gingharian. Ang gingharian sa Diyos gihulagway ni Santa Teresita nga langit, ug sya nagkanayon, “Akong puy-an ang akong langitnong kinabuhi pinaagi sa paghimo ug maayo dinhi sa yuta.” (I will spend my heaven doing good on earth). Gibutyag niining maong Santa nga ang gingharian sa Diyos dili layo kanato, dili hataas kondili anaa lamang sa atong kasing-kasing kung kita maantigong mahigugma.

Si San Pablo sa iyang sulat ngadto sa taga-Efeso nagkanayon, tungod kang Kristo pagtinahuray ug paghinigugmaay kamo. Asawa tahura ug sunda ang inyong mga bana, ug mga bana higugmaa ang inyong mga asawa sama nga gihigugma ni Hesus ang iyang simbahan ug gitugyan ang iyang kinabuhi tungod ug alang niini. (Ef.5:21) Gipasabot ni San Pablo sa iyang sulat nga ang kasinatian sa gingharian sa Diyos magasugod sa paghigugma sa bana ngadto sa iyang asawa ug ang asawa motahud ug mahigugma ngadto sa iyang asawa. This is what we mean of the kingdom of God. Nga sa ato ang gingharian sa Diyos magasugod sa paghinigugmaay sa bana ug asawa diha sa pamilya.

Sa ebanghelyo ni San Lucas karong adlawa, simple lamang ang paghulagway ni Hesus sa gingahrian sa Diyos, liso sa mustasa ug igpapatubo sa pan. Ingana ka gamay ang pagsabot sa gingharian sa Diyos. Dili dako, dili luag, dili haw-ang. Usa lamang kini ka pitik sa gugma dinha sa tagsa-tagsa nato ka kinabuhi. Apan kung kining maong pitik sa gugma diha sa atong kasing-kasing pagapuy-an sa tinouray gayud, mao kini ang sinugdan sa pagpaubos, pagkamatarong, paghigugma, pangkamanggihatagon, pagkamaloloy-on, pagkamatinabangon ug pagkabalaan. Dinhi gipasabot nga sa gamay’ng liso sa mustasa mitubo ug midako ug nahimong dakong punuang kahoy diin ang mga kalanggaman nagsalag ug namuyo nga malipayon. Sa samang pagkaagi, nga kon kining liso sa gugma atong paturokon dinha atong mga kasing-kasing, dili layo nga kita motubo ug malambo ug mamahimong tinubdan sa katarong, kaayo ug gugma diha sa kalibutan.

Ug sa katapusan, kita gipahinumduman sa ebanghelyo karong adlawa nga ang atong gipangandoy nga gingharian sa Diyos wala didto sa layo kundili anaa lamang sa atong kasing-kasing. Ug ang kahingpitan niining maong gingharian sa Diyos masinati lamang kung kita maantigong mahigugma sa atong isig katawo. Ang gugma bisan unsa ka gamay kung kini tinuoray magdala kanato sa kinabuhing tunhay. Amen