Ang gasa sa bokasyon sa pagkadiakono usa ka halangdong gasa gikan sa Diyos. Usa ka gasa nga nagapadayag sa kahalapad sa Diyosno’ng Gugma alang sa Iyang lungsod nga pinili. Kay kining maong bokasyon gasa man, angayan lamang nga kini ipaambit ngadto sa uban. Kay ang tinouray nga kahulugan sa tawag sa pagka diakono mao ang pagpangalagad ngadto sa Diyos pinaagi sa Iyang katawhan.
Tungod niini, tuguti ako sa pagpaambit niining maong gasa nganha kaninyo. Nasayod ako nga sa milabay’ng mga katuigan kamo mipadayag sa inyong tim-os nga pagsuporta kanako dinha sa inyong mga pag-ampo. Mao kini ang hinungdan nga ako nagmalampuson ug natuman kanako ang tawag sa Labaw’ng Makagagahum. Kung wala pa ang kadasig sa inyong mga pangaliya, dili nako makab-ot kining maong kalampusan sa akong pormasyon sa pagkapari.
Subay niini, ako magpadayag sa akong dakong pasalamat kaninyong tanan. Ang akong kalampusan, kalampusan natong tanan ug sa tibuok Simbahan. Nag paila lamang kini nga ang Diyos wala masilag sa kalibutan, hinonoa, nagpabiling Siya’ng nahigugma sa niini kay nagpadayon Siya sa pagtawag og mga tao aron moalagad sa Iyang Simbahan.
Uban sa dakong kahinangop, ako kamong dapiton sa pagsaksi sa akong ordinasyon sa pagka-diakono karong umaabot Desyembre 15, 2010, adlawa’ng Meyerkoles, sa may alas 9:30 sa buntag (am) didto sa Katedral ni San Jose, Dakbayan sa Tagbilaran. Akong ikalipay ug ikasadya ang bisan unsa nga inyong ikatampo ug ikahatag alang sa kalampusan niining maong kasaulugan.
Inubanan sa pangaliya ni Santa Maria, atong Inahan, unta ang Diyos sa Iyang dakong gugma ug kalooy, magauban unta kanatong tanang alang sa kahingpitan sa atong pagtoo diha ni Kristo ug sa Espiritu Santo, hangtud sa kahangturan. Amen
